اعمل إزاي Portfolio؟

ميشو شغله اتطور فعلاً بعد شهور من التعلم، تصاميمه بقت أحسن بمراحل من أول يوم

المشكلة إنه لما فتح Portfolio، حط فيه تصاميم لوجوهات وبوسترات لبراندات اخترعها من دماغه

"براند للقهوة المربعة"، "شركة تك وفك"، "متجر السيكي والميكي لـ اللبس المكسيكي"

ومحدش اداه أي اهتمام

ليه الـ Mock مش بيشتغل

لما العميل بيفتح Portfolio بتاعك، بيعمل حاجة واحدة: بيحاول يتخيل شغلك على بيزنس حقيقي

لو البراند اللي شغلت عليه موجود من دماغك إنت، العميل مش عنده مرجع

مش عارف البراند الأصلي إيه، ولا إيه اللي كان المطلوب، ولا إيه القرارات اللي اتخذت وليه

يعني مش قادر يقيّم قدرتك، بس قادر يقيّم "الحاجة دي حلوة ولا لا" وده مش كفاية

نور بدل ما يخترع براندات، راح اختار شركات كبيرة حقيقية ومشهورة

وعمل لها تصاميم فيك مجاناً، redesign لـ identity، بوسترات، سوشيال ميديا كونتنت

الناس شافت الشغل وقدرت تحكم عليه لأنها عارفة الشركة وبراندها ومحتواها

وبعض الشركات دي اتواصلت معاه فعلاً عشان يعملهم شغل

اختار براندات الناس تعرفها، اعمل عليها شغل حقيقي أو شبه حقيقي، واعرض تفكيرك مش بس النتيجة

وضح في كل مشروع: إيه المشكلة؟ وإيه اللي عملته؟ وليه؟

ده اللي بيفرق بين Portfolio بيتفرج عليه وPortfolio بيجيب شغل

مش محتاج تدفع على موقع، في خيارات كتير:

Behance: الأشهر للمصممين، مجاني، وبيجيب traffic من عملاء بيدوروا أصلاً

Dribbble: أحلى بصرياً من Behance، بس محتاج invitation للنشر في الأول

Notion: كتير من الفريلانسرز بيعملوا Portfolio page على Notion مجاناً وبتبان احترافية

Carrd.co: موقع بسيط جداً تعمل بيه صفحة واحدة بتعرض فيها شغلك، الـ free plan كافي للبداية

GitHub Pages: لو بتشتغل في البرمجة، ده الأنسب ليك و مجاني تماما

ملاحظة: مش محتاج تكون على كل المنصات دي، اختار واحدة وخليها كويسة

لما تعمل Resume ارجوك خلي الملف بأسمك
ما تحطش "Vision" او "Goals" بس حط Summary لخبراتك
ما تحطش اي حاجة العميل مش هيحتاج يشوفها/هيتوقع وجودها بالفعل، زي مثلا انك خبير في فوتوشوب.
ما ترميش عنوان بيتك في البورتفليو ارجوك