إزاي تختار مجالك؟
كريم دخل كلية حاسبات
مش لأنه بيحب البرمجة، لأن أهله قالوله "دي كلية المستقبل" وكل يوتيوبر شافه قاله "تعلم coding وغير حياتك"
السنة الأولى والتانية عدوا بشكل معقول، بيتعلم، بيحل مسائل، حاسس إنه ماشي
السنة التالتة جاله DSA..
الداتا ستراكشرز وأزمة الهوية
Data Structures and Algorithms: البعبع اللي بيكشف مين فعلاً بيحب البرمجة ومين دخل الكلية عشان "المستقبل"
كريم اتلخبط
مش لأنه غبي، لأنه اكتشف إن البرمجة ك تخصص مش بتاعته، وإن السنتين اللي فاتوا كانوا على حاجة مش بيحبها ومش بيتميز فيها
بدأ يفكر يخش تجارة، أو يكمل وهو مش مقتنع، أو يعمل فريلانس في "أي حاجة"
المشكلة مش في كريم
المشكلة إن كريم من الأول اختار مجال بناءًا على ضغط خارجي مش على سؤال واحد بسيط:
إنت بتتميز في إيه؟
مش بتحب، مش بتتمنى، بتتميز فعلاً
الفرق بين الهوى والتميز
الهوى مهم، بس مش كافي
ممكن تحب الموسيقى وتكون عازف وحش، ممكن تحب الديزاين وشغلك مش قد كده
التميز هو اللي بيحوّل المهارة لفلوس
السؤال الصح مش "بتحب تعمل إيه؟" السؤال الصح:
"إيه اللي لما بتعمله، الناس بتقولك إنت كويس فيه من غير ما تطلب رأيهم؟"
طب إزاي تختار فعلاً
الخطوة الأولى: اكتب كل حاجة بتعرف تعملها
مش لازم تكون محترف، حاجات بتعملها أحسن من الناس اللي حواليك. كتابة، تصوير، كلام مع ناس، تنظيم، رسم، شرح، تحليل، أي حاجة
الخطوة التانية: فلتر بسؤالين
الأول: في ناس بتدفع على ده؟ مش كل موهبة سوق ليها عملاء
التاني: تقدر تتحسن فيه؟ التخصص محتاج عمق، لو السقف منخفض مش هينفع
الخطوة التالتة: جرب قبل ما تلتزم
قبل ما تقول "أنا هبقى video editor"، اشتغل مشروع واحد مجاناً أو برخيص (ما تبقاش مشموش وتخرب السوق). شوف هتحس بإيه لما تخلصه وإنت تعبان. لو حسيت برضا، ده علامة كويسة. لو حسيت بـ "خلاص كدا خلصت"، فكر تاني
هل كريم يسيب كليته؟
كريم مش لازم يسيب الحاسبات
ممكن يلاقي جوّاها حاجة بتناسبه، UI/UX مثلاً، أو Technical Writing، أو حتى Project Management
الكلية مش هي المجال، هي بيئة فيها مجالات كتير
المشكلة مش إنه دخل حاسبات، المشكلة إنه ما سألش نفسه السؤال الصح من الأول
مع ان المثال دا على حاسبات، بنشوف دا بيحصل كتير اوي مع اخواتنا في هندسة وطب، ماتسيبوش الكلية ارجوكم وماتتعلموش مجال مش مجالكم لمجرد انكم عايزين فلوس