المجالات المبالغ في قيمتها
"شغل من البيت بدولارات" مش معناها شغل كويس
مش كل حاجة بالدولار تستاهل وقتك
في مجالات كاملة اتبنت على وعود فارغة وناس كتير ضيعت وقت وطاقة فيها قبل ما تعرف الحقيقة
نسخ الصوت (ارجوك ما تعملهاش)
شركة فلان العلاني هتجيبلك واحد من باكستان او نيبال يجي يكلمك على ديسكورد فويس ويقولك "ممكن استعمل صوتك لتدريب الAI بتاعي؟ دا هواية كدا" لما تقوله لأ هيبدا يغريك
- هتاخد ٣ دولار في الساعة
- هتاخد ١٠ طيب
- طب ٢٠؟
كل دا عشان بس ينسخ صوتك ويتدرب عليه ويبقى بيقلد صوت العرب والمصريين عموما، واللي هي مهمة صعبة وتكلفتها اكيد مش ٢٠ دولار في الساعة بل اكتر لأن دي حاجة مطلوبة جدا
و الله اعلم صوتك هيستعملوه في ايه..
الترجمة والـ AI Tasks زي Outlier
اوتلاير وأخواتها بتعملك إعلان جميل: "اشتغل من البيت، قيّم ردود الـ AI، واكسب بالدولار"
الحقيقة: دولارين في الساعة في أحسن الأحوال، والشغل نفسه ممل بشكل يؤلم الروح. بتقعد تقيّم جمل، تصحح ردود، تعمل data labeling لساعات من غير ما تحس إنك بتتعلم أو بتتطور
ومش بس كده، النوع ده من الشغل محكوم عليه بالاختفاء لأن الـ AI نفسه بيتحسن وبيحتاج أقل وأقل تدخل بشري
وقتك يساوي أكتر من دولارين في الساعة
الديزاين بالـ AI
الموضوع مش إن الـ AI مش بيعمل حاجات حلوة، الموضوع إن أي حد تاني يقدر يعمل نفس الحاجة بنفس الأداة
لما الفارق بينك وبين أي حد تاني هو بس إنك تعلمت تكتب prompt كويس، ده مش تخصص، ده مهارة بتتعلمها في يوم
العملاء اللي بيدفعوا كويس بيدفعوا على الحكم والخبرة والـ brand understanding، مش على إنك تعرف تشغل Midjourney
اللي بينجح في الديزاين دلوقتي هو اللي بيستخدم الـ AI كأداة جوه تخصص حقيقي، مش اللي بيبيع "ديزاين بالـ AI" كـ خدمة
الكتابة بالـ AI
في معرض الكتاب المصري 2026 اتكشف الموضوع بشكل واضح، كتب كتير طلعت مكتوبة بالـ AI والناس حست بالفرق على طول
العنصر الإنساني في الكتابة مش هو الصوت والتجربة والزاوية اللي مش أي prompt هيعملها حتى لو حاول ١٠٠ سنة
نفس الكلام على المحتوى التسويقي، المقالات، السكريبتات. اللي بيبيع "محتوى AI" من غير قيمة مضافة حقيقية بيتنافس مع أدوات بتشتغل بدونه في الشهر
شغلانات الـ Data Entry والـ Microtasks
"اكسب 18 سنت لكل صورة تصنّفها"
حتى لو اشتغلت 8 ساعات يومياً، مش هتوصل لحد أدنى معيشي. والشغل ده مش بيعلمك حاجة، ومش بيبني CV، ومش بيفتح أي باب
الفخ إنه سهل وفوري، فبيحسسك إنك شغال بين قوسين، او ممكن شغال على نفسك ماتعرفش
القاعدة العامة
أي مجال فيه:
- ناس كتير جداً بتعمله بسهولة
- أدوات AI بتعمله بدونك
- سعره بينزل كل يوم
- مش محتاج خبرة أو تخصص حقيقي
- نسخ الصوت بتاعك
ده مجال محكوم عليه إما بالاختفاء أو بأسعار مش بتستاهل وقتك
اللي بينجح دايماً
العنصر الإنساني الحقيقي التخصص العميق، والحاجات اللي الـ AI يقدر يساعد فيها بس مش هيعرف يعملها لوحده
مش "ديزاين بالـ AI"، ديزاينر بيستخدم الـ AI
مش "كتابة بالـ AI"، كاتب عنده صوت حقيقي بيستخدم الـ AI يسرع شغله
ومش اي شغل فيه كلمة دولار او يورو يزغلل عينيك.